Turnfahrt Frauenriege Brunnadern | 10.-11. September 2023

Am Sunntig morge hend mer üs bim Bahnhof besammlet.

Leider het s,Bahnhöfli zue, mer hend ohni guete kaffi

üseri Reis müesse starte.

Am 20 nach siebni sind mer is Poschtauto i gstege. Mer sind über Oberhelfenschwil nach Dietfurt gfahre.

Dei hemmer nüd lang uf de Zug müesse warte.

Üseri Reis goht ziemlich wiit, drom

isch den scho bald Apéro zit.

Mer fahret mit em Zug noch Wil, Züri, Bern,

am Thunersee entlang bis noch Interlake.

Do müend mer Umstiege, de Rucksack zäme packe.

Witer gohts off Luterbrunne.

Vo Luterbrunne goht’s mit de Luftseilbahn uf d’Grütschalp

det machet mer üse Mittagshalt.

Vo de Grütschalp wanderet mer bi de Pletschenalp verbi zum Bergrestaurant Almendhubel ischs den nümme so wit gsi.

Äs chüels Bier,ä herrlichi Ussicht was wötsch no meh

Eiger Mönch und Jungfrau chasch vo do us gseh.

Jetzt tüend mer scho bald üsers Nachtlager ufsueche

Im Mounten Hostel z’Gimmelwald het d’Monika buechet.

Do a cho das isch doch en Witz ,

mer sind glaub z England und nümme i de Schwiiz.

Die schwätzet no englisch und nöd Schwizerdütsch.

S Nachtlager isch nöd würkli en Hit.

Aber hauptsach das es öppis z’ esse git.

No lang händ mer de Obet verosse gnosse,

De Tag den mit eme Jass abgschlosse.

Scho bald isch’s den wieder Morge gsi.

Wie schnell goht doch die Zit vebi.

Noch äm z,Morge sind mer froh

das mer s englisch nüd chönnt verstoh.

Öppis vo abwäsche sig uf em zettel gstande

aber das hend mer leider nöd verstande.

Jetzt hend mer üseri Unterkunft verloh,

De Weg richtig Schilthorn mit de Bahn gno.

Vo Gimmelwald mit de Bahn döruf

z,Fuess chämtet mer do ziemli in schnuf.

Z ,Birg machet mer en zwüschehalt.

Mer sind froh het d,Raiffise öppis a,d fahrt ane zahlt.

Z,Birg het,s en Felsesteg,

Äs paar woget sich det über de Weg.

Uf em Piz Gloria het d,Monika en Tisch reserviert

So höch obe bisch froh wenns nöd pressiert.

Do uf em Schilthorn chasch über 2000 Berggipfel bestune

Bim Mittagesse im Drehrestaurant hend alli ä gueti Lune.

Mit de Luftseilbahn hend mer,s Schilthorn verloh,

sind guet in Stechelberg a,cho.

Mer tüend do de Wegwieser studiere,

den a de Lütschiene no richtig Luterbrunne marschiere.

Bi de Gartewirtschaft tuet mer nöd verbi laufe

do no schnell öppis z,Trinke kaufe.

Ups, jetzt müend mer den öppe go ,

söss loht üs den s Poschtauto no stoh.

Im übervolle Poschtauto sind mer z,Luterbrunne a,cho,

den de Zug richtig Bern,Züri gno.

Z, Züri stieget mer in Zug noch Rapperswil, ii.

Jetzt isch den die Reis au scho wieder verbii.

Bi de Monika Frick bedanke mer üs für die schö Reis.

Im Bahnhöfli nend mer zum schluss no eis.